Adliya vazirligi Mediatorlarning kasb etikasi qoidalarini davlat roʻyxatidan oʻtkazdi. Bu haqida “Huquqiy axborot” Telegram-kanali xabar berdi.

Unga koʻra, mediatorlar:

• kasb etikasi qoidalariga rioya qilishi, mediatorlik faoliyatini halol va vijdonan bajarishi, mediatorlarning shaʼni, qadr-qimmati va ishchanlik obroʻsini saqlashi;
• oʻz faoliyatini maxfiylik, ixtiyoriylik, mediatsiya taraflarining hamkorligi va teng huquqliligi, mediatorlarning mustaqilligi va xolisligi prinsiplari asosida amalga oshirishi;
• mediatsiya taraflarining mediatsiya jarayonida teng imkoniyatlarga ega boʻlishini taʼminlashi lozim.

Shuningdek, mediatorlar mediatsiya taraflari bilan munosabatlarda:

• taraflarga mediatsiyaning maqsadi va ularning huquq va majburiyatlarini tushuntirishi;
• mediatsiyani oʻtkazish tartibi haqida maʼlumot berishi;
• taraflarga kasbiy malakasi va ish tajribasi toʻgʻrisida ishonchli maʼlumot berishi;
• taraflarga nisbatan hurmat va xushmuomalalik koʻrsatishi;
• taraflarni nizoni hal qilishning maqbul variantlarini izlashga undashi;
• muzokaralar natijasini bir tarafning foydasiga koʻzlab ish olib bormasligi lozim.