Saminjon HUSANOV/“Xalq soʻzi”. Shu kunlarda respublikamiz boʻylab Maʼnaviyat festivallari boʻlib oʻtmoqda. Mustaqilligimizning 33-yillik sanasini koʻtarinki kayfiyatda nishonlash maqsadida tashkil etilgan ushbu tadbir respublika Maʼnaviyat va maʼrifat markazi, yozuvchilar uyushmasi, maʼrifat targʻibotchilari jamiyatlari hamda qator tashkilotlar bilan hamkorlikda oʻtkazilmoqda. Festival doirasida “Inson qadri”, “Maʼrifatli oila”, “Mehr-saxovat”, “Uch avlod uchrashuvi”, “Ziyolilar forumi”, “Kino karvon” kabi oʻnlab tadbirlar boʻlib oʻtmoqda.

— “Bir boʻlsak – yagona xalqmiz, birlashsak Vatanmiz!” shiori ostidagi festival tadbirlari Andijon viloyatining 12 ta shahar va tumanlarida davom etmoqda, — deydi respublika Maʼnaviyat va maʼrifat markazining Andijon viloyati boʻlimi rahbari Abdulhamid Nurmatov. — Tadbirlar oʻquv yurtlari, mehnat jamoalarida emas, balki, xonadonlarda ham boʻlib oʻtmoqda. Unda respublikamiz Mustaqillik yillarida erishgan yutuqlari eʼtirof etilib, ibratli jihatlar keng jamoatchilikka targʻib etilmoqda.

Andijon tumanidagi “Ravon taraqqiyot orzusi” masʼuliyati cheklangan jamiyatida boʻlib oʻtgan maʼnaviyat festivalida respublikamiz istiqlolga erishgach, ishbilarmonlar uchun yaratilgan qulayliklar tilga olindi. Misol uchun, ushbu korxonani olaylik. 150 turdagi poyabzal mahsulotlari ishlab chiqaruvchi ushbu korxona mahsulotlari oʻnlab davlatlarga eksport qilinmoqda. Buning uchun 1,5 ming nafardan ziyod ishchilar samarali mehnat qilmoqda.

— Tadbirda respublikamizning taniqli sanʼatkorlari, olimlari ishtirok etdi, — deydi korxona ishchisi Sanobarxon Fayzullayeva. — Ular tomonidan ijro etilgan kuy-qoʻshiqlar, sahna asarlari maʼnaviy ozuqa berib qolmasdan, kuchimizga-kuch qoʻshdi.