Bugun Navoiy viloyatida 1 479 ta MTTlari faoliyat koʻrsatib, hududdagi 3-6 yoshgacha boʻlgan bolalarning 87,8 foizi maktabgacha taʼlim tizimiga qamrab olingan. Oʻn yil avval ushbu koʻrsatkich qariyb uch baravarga past boʻlib, u ham boʻlsa asosan viloyatdagi shahar va qoʻrgʻonlar hissasiga toʻgʻri kelardi.

Oʻtganiga salovat, galdagi eʼtibor tizimda taʼlim-tarbiya sifatini oshirishga qaratilib, Respublika Prezidentining shu maqsadlarni oʻzida mujassam etgan joriy yil 5-fevralidagi “Maktabgacha taʼlim va tarbiya tizimini yanada takomillashtirish chora-tadbirlari toʻgʻrisida”gi qarorida belgilangan vazifalar va ularning ijrosini taʼminlashga qaratilgan.

Viloyat maktabgacha va maktab taʼlimi boshqarmasining hududdagi OAV vakillari uchun oʻtkazgan matbuot anjumanida ayni masalalar muhokama etilar ekan, asosiy eʼtibor 6 yoshlilar qamrovini joriy yilda 99,5 foizga yetkazishga qaratildi.

— Bugun ilgʻor dunyo tajribasi maktabgacha bosqich taʼlim tizimining eng hal qiluvchi davri ekanligini koʻrsatmoqda, — deydi viloyat maktabgacha va maktab taʼlimi boshqarmasi boshligʻining birinchi oʻrinbosari Abror Latipov. —Aynan hayotining mazkur bosqichida bolaning jismoniy va ruhiy koʻnikmalari jadal surʼatlar bilan rivojlanadi. Ularda ong, til, atrofni anglash, munosabatga kirishish, muammolarni hal qila olish qobiliyatlari shakllanadi. Ushbu davrning bir kunini oʻtkazib yuborish ham bola qobiliyatlarining shakllanish darajasi va surʼatiga bevosita taʼsir koʻrsatadi.

Matbuot anjumanida shuningdek, viloyatdagi MTTlarida taʼlim-tarbiya sifatini oshirish boʻyicha olib borilayotgan tajriba hamda amaliyotga tatbiq etilayotgan gʻoyalar xususida atroflicha maʼlumot berilib, jurnalistlar oʻzlarini qiziqtirgan savollarga javob olishdi.

Temur ESHBOYEV,

“Xalq soʻzi”.