Foto: Prezident Matbuot xizmati

Avval xabar berganimizdek, Prezident Shavkat Mirziyoyev raisligida xotin-qizlarni qoʻllab-quvvatlash tizimini yangi bosqichga koʻtarish va ayollarning jamiyatdagi oʻrnini yanada yuksaltirish va mustahkamlash, shuningdek, ularning ijtimoiy himoyasini kuchaytirish, oilaviy zoʻravonlikning oldini olish, gender tenglikni qaror toptirishga qaratilgan muhim chora-tadbirlar yuzasidan videoselektor yigʻilishi boʻlib oʻtmoqda.

Yigʻilish davomida Mahalla va oilani qoʻllab-quvvatlash vazirligi Mahalla va nuroniylarni qoʻllab-quvvatlash vazirligi sifatida qayta tashkil etildi. Unga rahbarlik qilish Prezident maslahatchisi Tursinxon Aydarovich Xudaybergenovga yuklatildi. Bu haqda Prezident Matbuot kotibi Sherzod Asadov maʼlum qildi.

Farzandlarimiz tarbiyasida nuroniylarimizning bilimlari va hayotiy tajribasidan keng foydalanishimiz zarur, dedi Prezident.

Shu bois, “Nuroniy” jamgʻarmasi rahbari Sodiqjon Turdiyev vazirning birinchi oʻrinbosari boʻladi.

Endi mahalla tizimida ham mutlaqo yangi tizim yaratiladi.

Joylarda bu vazifa bevosita hokimlarning zimmasiga yuklatiladi, hokim oʻrinbosari lavozimi qisqartiriladi.

Mahalla raisi oʻz hududida hokim yordamchisi, yoshlar yetakchisi va xotin-qizlar faoliyatini muvofiqlashtiradi va mahallada oʻzaro hamjihatlikda ishlashni taʼminlaydi.

Shuningdek, Prezident Xalq qabulxonalarining vazifalari ham endi shahar va tumandan mahallaga tushadi, mahallabay fuqarolarni qabul qilib, ularning masalalari yechimiga yordam beradi.