Korrupsiyaviy jinoyatlarning 75 foizi tuman va mahallada maishiy korrupsiya shaklida sodir etilayotgani qayd etildi. Masalan, infratuzilmaga ulanish, litsenziya olish, imtiyozli kredit ajratish, ishga qabul qilish, malaka oshirish kabi yoʻnalishlarda korrupsiya omillari koʻp.

Tergovchi, prokuror va sudyalar qoʻlidagi ish boʻyicha idoralarga taqdimnoma va xususiy ajrim kiritishdan nariga oʻtmayotgani, ularning muhokamasi ham, javobi ham quruq rasmiyatchilik ekani koʻrsatib oʻtildi.

Viloyat hokimlari rahbar boʻlgan korrupsiyaga qarshi kurashish hududiy kengashlarining ishi ham juda sustligi, faoliyati tuman, mahalla bilan bogʻlanmagani uchun natija yoʻqligi qayd etildi. Parlament masʼul qoʻmitalarining ham oʻrni sezilmayotgani aytildi.

Korrupsiyaga qarshi kurashish hududiy kengashlari tarkibini toʻliq yangilash, ularga rais etib viloyat xalq deputatlari kengashi raislarini tayinlash taklif etildi.

Hududiy kengashlar insongacha tushib, korrupsiyaviy omillarni aniqlashi, ularga barham berish uchun qaysi qonunni oʻzgartirish zarur, degan savollarga javob topishi kerakligi taʼkidlandi.

Kengashlar har chorakda kamida bitta sohada korrupsiyaviy omillarni bartaraf etish, qonun ustuvorligi, jazo muqarrarligini taʼminlash boʻyicha Milliy kengashga taklif kiritadi.