Ijtimoiy tarmoqlarda nomaʼlum shaxs koʻp qavatli uy yoʻlagida pichoq koʻtargan holda harakatlangani aks etgan video tarqaldi. Poytaxt IIBB mazkur shaxs maʼmuriy tartibda ushlanganini maʼlum qildi.

Bildirilishicha, kecha, 5-yanvar kuni tungi soat 01:35 larda Yashnobod tumanidagi koʻp qavatli uylardan birida yashovchi 42 yoshli O.S. mast holatda qoʻshnisi D.Y.ning eshigini taqillatib, uni bezovta qilgan. U jamoat joyida boʻla turib, sovuq qurol sifatida foydalanilishi mumkin boʻlgan ashyoni qonunga xilof ravishda olib yurib, jamoat tartibini buzgan.

Ushbu holat yuzasidan tuman ichki ishlar organlari xodimlari tomonidan tezkorlik bilan chora koʻrilgan va huquqbuzar maʼmuriy tartibda ushlangan.

Yashnobod tumani IIO FMB tomonidan fuqaro O.S.ga nisbatan Maʼmuriy javobgarlik toʻgʻrisidagi kodeksning 183 (“Mayda bezorilik”), 185 prim.2 (“Sovuq qurolni yoki sovuq qurol sifatida foydalanilishi mumkin boʻlgan ashyolarni olib yurish”), 194 (“Ichki ishlar organlari xodimining qonuniy talablarini bajarmaslik”) moddalari bilan maʼmuriy bayonnoma rasmiylashtirilgan.

Shuningdek, toʻplangan hujjatlar jinoyat ishlari boʻyicha Yashnobod tumani sudiga yuborilib, sud tomonidan ushbu shaxsga maʼmuriy qamoq jazosi tayinlangan.