Odilbek ODAMBOYEV/“Xalq soʻzi”. Urganch shahridagi “Yoshlik” sport majmuasida hududiy tarmoqlararo sanoat yarmarkasi oʻz ishini boshladi. Ushbu yarmarkani oʻtkazishdan asosiy maqsad – sanoat mahsulotlari ishlab chiqarishda kooperatsiya aloqalarini rivojlantirish, xoʻjalik yurituvchi subyektlar oʻrtasida oʻzaro hamkorlik uchun qulay shart-sharoitlar yaratishdan iborat.

Yarmarkaning ochilish marosimida Xorazm viloyati hokimi Joʻrabek Rahimov ishtirok etib, koʻrgazma pavilyonlaridan joy olgan, mahalliy sanoat korxonalarida ishlab chiqarilgan mahsulotlar namunalari bilan tanishdi, tadbirkorlar bilan muloqotda boʻldi.

— Sanoat yarmarkasida respublikamizning barcha hududlaridan kelgan ishlab chiqaruvchilar turizm, avtomobilsozlik, qishloq xoʻjaligi texnikasi, mebelsozlik, kimyo va toʻqimachilik sanoati boʻyicha oʻz mahsulotlari bilan qatnashmoqda, — deydi Xorazm viloyati hokimining mahalliy sanoatni rivojlantirish masalalari boʻyicha yordamchisi Fozilbek Xudoyberganov. — Koʻrgazmada innovatsion ishlanmalar asosida tayyorlangan yangi turdagi mahsulotlar hamda import oʻrnini bosuvchi buyumlar qatnashchilarning diqqat eʼtiborini tortmoqda. Yarmarka ertaga oʻz ishini davom ettiradi.