Foto: Prokratura departamenti

Xorazm, Surxondaryo va Qashqadaryo viloyatlarida valyuta qimmatliklarini noqonuniy muomalaga kiritilishining oldi olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Maʼlum qilinishicha, departamentning Tuproqqalʼa tuman boʻlimi tomonidan tezkor tadbir oʻtkazilgan. Tadbirda valyuta ayirboshlash bilan shugʻullanib kelgan J.A., B.I., D.D. jami 4 ming dollarni fuqaro Sh.A.dan 50,4 million soʻmga sotib olgan vaqtlarida ashyoviy dalillar bilan ushlangan.

Departamentning Denov tuman boʻlimi tomonidan oʻtkazilgan tezkor tadbirda valyuta ayirboshlash bilan shugʻullanib kelgan N.M. va N.D. jami 3,3 ming dollarni fuqaro A.A.ga 41,9 million soʻmga sotgan vaqtlarida ashyoviy dalillar bilan qoʻlga olingan.

Mirishkor tumanida oʻtkazilgan tezkor tadbirda esa valyuta ayirboshlash bilan shugʻullanib kelgan N.N. jami 2 950 dollarni fuqaro B.T.ga 37,4 million soʻmga sotgan vaqtida ashyoviy dalillar bilan ushlangan.

Departamentning Koʻkdala tuman boʻlimi tomonidan IIB xodimlari bilan hamkorlikda oʻtkazilgan tezkor tadbirda valyuta ayirboshlash bilan shugʻullanib kelgan E.B. jami 2,9 ming dollarni fuqaro R.A.dan 36,3 million soʻmga sotib olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki oʻtkazish) bilan jinoyat ishlari qoʻzgʻatilib, tergov harakatlari oʻtkazilmoqda.