Joriy yilning 19-21-sentyabr kunlari Rishton tumanida ikkinchi Xalqaro kulolchilik forumi boʻlib oʻtadi. Ayni kunlarda ushbu nufuzli anjumanga yuqori saviyada tayyorgarlik koʻrilmoqda.

Shu maqsadda tuman miqyosida keng koʻlamli qurilish-bunyodkorlik ishlari olib borilib, kulolchilik markazlari, tarixiy-madaniy inshootlar zamonaviy qiyofaga ega boʻlayotir. Yangi turizm marshrutlari ishlab chiqish, savdo-xizmat koʻrsatish tarmoqlari faoliyatini kengaytirish, tajribali kulollar ishtirokida mahorat darslari tashkil etish, uy-mehmonxonalari ochish kabi vazifalar ijrosiga ham alohida eʼtibor qaratilmoqda.

— Dunyoning oʻnlab davlatlari, qolaversa, mamlakatimizning barcha hududlaridan kulollar, sayyohlar tashrif buyurishi kutilayotgan anjumanga tayyorgarlik ishlari jarayonida forum oʻtkaziladigan hududlarni kompleks ravishda obodonlashtirish ishlari izchil davom etmoqda, — deydi Fargʻona viloyati hokimi oʻrinbosari Xurshidjon Ahmedov. — Bu borada mavjud infratuzilmani yanada yaxshilash hamda mehmonlarni munosib kutib olishga doir chora-tadbirlar rejasi ishlab chiqilgan.

Rishton tumanida oʻtkaziladigan II Xalqaro kulolchilik forumida barcha ishlar yuqori saviyada tashkil etilishi uchun masʼullarga aniq vazifalar va bajarilish muddatlari belgilab berilgan.

Botir MADIYOROV,

“Xalq soʻzi”.