“Hududiy elektr tarmoqlari” aksiyadorlik jamiyati Samarqand hududiy filialining maxsus poligonida turkiy tilda soʻzlashuvchi davlatlarning taqsimlash tarmoqlari elektromontyorlari oʻrtasida xalqaro kasb mahorati musobaqasi oʻtkazildi.

​

Ushbu musobaqada Ozarbayjon, Qozogʻiston, Qirgʻiziston, Tatariston, Turkiya hamda mamlakatimiz elektromontyorlaridan iborat 6 ta jamoa qatnashdi. Jamoalar texnik tayyorgarlik, jarohatlangan xodimga birinchi tibbiy yordam koʻrsatish hamda elektr qurilmasida yuzaga kelgan yongʻinni bartaraf etish boʻyicha oʻz bilim va tajribasini sinovdan oʻtkazdi.

​

Musobaqada Oʻzbekiston sharafini himoya qilgan “Hududiy elektr tarmoqlari” AJ jamoasi faxrli 1-oʻrinni qoʻlga kiritdi. 2-oʻrin Qirgʻiziston va Tatariston energetiklariga, 3-oʻrin esa qozogʻistonlik mutaxassislarga nasib etdi.

​

Yangi innovatsion gʻoyalarni taqdim qilgan Ozarbayjon jamoasi Gran-pri sovriniga munosib koʻrildi. Musobaqa yakunida turli nominatsiyalar boʻyicha ham gʻoliblar taqdirlandi.

​

— Musobaqaning tarixiy shahar — Samarqandda oʻtkazilgani bizga manzur boʻldi, — deydi Chimkent shahri elektr tarmoqlari bosh muhandisi, Qozogʻiston jamoasi masʼuli Serik Turgʻunboyev. — Jamoamiz yaxshi tayyorgarlik koʻrib kelgan edi va bahslarda oʻz mahoratimizni namoyish etib, yaxshi natijaga erishdik. Ushbu musobaqa xalqaro tajriba asosida xodimlar kasbiy mahoratini oshirishga xizmat qilishi bilan ahamiyatlidir.

​

Tadbir doirasida ishtirokchilar samarqandlik hamkasblari faoliyati bilan yaqindan tanishish hamda oʻzaro tajriba almashish imkoniyatiga ham ega boʻlishdi.

​

Xalqaro musobaqa elektromontyorlar kasbiy malakasini oshirish, ilgʻor ish usullarini oʻrganish hamda soha mutaxassislari oʻrtasida hamkorlikni yanada mustahkamlashga xizmat qiladi.

Abdulaziz YOʻLDOSHEV

“Xalq soʻzi”.