Foto: «Xalq so‘zi»

Avval xabar berganimizdek, Namanganda  62-Xalqaro gullar festivali davom etmoqda. Uchinchi  kun  yakuni  bilan  anjumanga  tashrif buyurgan mehmonlar soni bir millionga yetdi. Nafosat bayrami dovrug‘ini eshitib  bu yerga oshiqayotgan oshuftalar orasida olis va yaqin xorijdan kelayotgan sayyohlar soni ham ortib bormoqda.  Zero, bir oyga mo‘ljallangan  ma’naviy-ma’rifiy va ko‘ngilochar tadbirlarning bari o‘z yo‘nalishi va mazmuni bilan kishini jalb etadi. Kecha oqshom Davlatobod tumanidagi  “Afsonalar bog‘i”  tematik parkida festivalning yana bir nafis tadbiri - Fashion festival& talants moda va san’at haftaligiga start berildi.

Bir hafta davom etadigan  haftalikda  Qozog‘iston, Qirg‘iziston, Tojikiston va Rossiya davlatlaridan tashrif buyurgan mashhur dizaynerlar ham betakror kolleksiyalari bilan ishtirok etmoqdalar. Respublikamiz  hududlaridan esa  40 nafar dizayner o‘z ijod namunalarini namoyish qiladi.

Aytish lozimki,  haftalikka mo‘ljallangan   modalar namoyishiga mahalliy dizaynerlarimiz USAID loyihasi ko‘magida to‘rt oy tayyorgarlik ko‘rdilar. Bu jarayonlarda yangi-yangi iqtidorlar kashf etildi.  Ayni  tadbir moda ijodkorlarining  xalqaro podiumlarni zabt etishlarida  tramplin vazifasini bajarib beradi.

Qudratilla NAJMIDDINOV, “Xalq so‘zi”.