Istam IBROHIMOV/“Xalq soʻzi”. Buxoro viloyatidagi bir qator maktabgacha taʼlim tashkilotlarida xalqaro MELQO baholash tizimi tajriba-sinovdan oʻtkazildi. U dastlab 8 ta, keyin esa 18 ta muassasada joriy etildi. Asosiy maqsad bolajonlarning maktabga tayyorgarligini yuqori darajaga olib chiqishdir.

— Ikki moduldan iborat bu tizim negizida bolalar va ota-onalar hamda pedagoglar bilan yaqin muloqot orqali kelajagimiz egalari boʻlgan oʻgʻil-qizlarga sifatli taʼlim berish vazifasi yotadi, — deydi Shofirkon tumanidagi 5-davlat maktabgacha taʼlim tashkiloti tarbiyachisi Gulandom Xudoyberdiyeva. — Shaxsan men shu tizim asosida ishlab kasbiy malakamni oshirishga erishdim. Guruhimdagi bolalarda toʻgʻri sanash, oʻz fikrini erkin bayon etish koʻnikmalari hosil boʻldi. Mashgʻulotlar bilan cheklanib qolmay, ular bilan yuzma-yuz muloqotga kirishdim. Bolajonlarga erkinlik berildi. Shu orqali ularning oʻz qiziqishidan kelib chiqqan holda turli oʻyinlar oʻynashiga imkon yaratildi. Natijada bolalar meni yaqin kishisi, doʻsti oʻrnida koʻrib, savollar beradigan, u yoki bu masalada fikrlarini bayon etadigan boʻlishdi.

Maʼlumot tariqasida aytish kerakki, MELQO xalqaro taʼlim tizimidan butun dunyoda erta yoshdagi bolalarni parvarish qilish hamda taʼlim sifatini aniqlash maqsadida foydalaniladi. U yurtimiz shart-sharoiti va milliy oʻquv standartlariga moslashtirilgan.