Muqobil elektr quvvati ishlab chiqarish borasidagi izlanishlar Mingbuloq tumanida faoliyat koʻrsatayotgan “Rah Abrisham trade” masʼuliyati cheklangan jamiyati shaklidagi qoʻshma korxonada yangi tarmoqni yoʻlga qoʻyish imkonini berdi. Tadbirkorlik subyekti hududdan oqib oʻtgan Zardaryo kanalining maxsus toʻsiq bilan jihozlangan qismiga Erondan keltirilgan kichik hajmli gidroelektrstansiyani oʻrnatish orqali yashil energiya ishlab chiqarishga kirishdi.

— Xorijlik mutaxassislar yordamida ishga tushirilgan qurilma bir kecha kunduzda ortiqcha xarajatlarsiz 30 kilovatt soat quvvat hosil qiladi, -deydi qoʻshma korxona ish boshqaruvchisi Muhammadsolih Ahmadaliyev. – MiniGES ayni paytda sinov tartibida harakatda. Unga qoʻshimcha uzatish uskunalari oʻrnatilgandan soʻng oqar suvdan olingan quvvatlar hisobiga oyiga 21600 kilovatt ekologik sof energiya asosiy tarmoqqa yuborila boshlaydi.

Mulkobod mahallasida roʻyobga chiqarilgan ushbu loyiha hududdagi tadbirkorlarga har jihatdan maʼqul tushdi. Ularning bir nechtasi Zardaryo kanalining tezoqar qismlarida shu singari arzon va qulay kichik energo qurilmalar oʻrnatishga qiziqish bildirishgan.

Qudratilla NAJMIDDINOV, “Xalq soʻzi”.