Italiyalik mashhur soprano Tereza Sparako Oʻzbekiston xalq artisti Botir Zokirovning “Maftun boʻldim” qoʻshigʻini yangi talqinda ijro qildi.

Oʻzbekiston diplomatik missiyasi tashabbusi bilan italiyalik soprano Tereza Sparako tomonidan ijro qilingan “Maftun boʻldim” qoʻshigʻi Neapol hududiy milliy telekanali — “Partenope TV” da efirga uzatildi.

Qoʻshiq ijro etilgan sahnadagi yirik ekranda Oʻzbekistonning sayyohlik salohiyati, qadimiy obidalari va shaharlariga bagʻishlagan videolavha namoyish etildi.

“Ushbu qoʻshiqni kuylashimga Oʻzbekistonga va mamlakatingiz sanʼatiga boʻlgan yuqori qiziqishim sabab boʻldi. Bundan avval ham Oʻzbekistonning Italiyadagi elchixonasi tomonidan tashkil etilgan bir qator madaniy tadbirlarda oʻzbek kuy-qoʻshiqlarini ijro etganman”, — dedi Tereza Sparako.

Tereza Sparako 1968-yil Kazerta shahrida tugʻilgan. U professional qoʻshiqchilar Mariya Raneri, soprano Gloriya Vardaci, tenor Franchesko Malapenadan taʼlim olgan. Neapoldagi San-Karlo teatri va Kazertadagi Qirollik saroyida konsert bergan. Shuningdek, Tereza Sparako “Caruso”, “Amici della Musica” singari mahalliy va xalqaro tanlovlar laureati hisoblanadi.