IT inkubatsiya markazi qariyb bir gektar maydonni egallab, loyiha EPC+F (muhandislik, taʼminot, qurilish va moliyalashtirish) modeli asosida Xitoyning Oʻzbekistondagi “Shanghai Construction Group” kompaniyasi tomonidan amalga oshirilmoqda.

“Raqamli Oʻzbekiston – 2030” strategiyasida belgilangan ustuvor vazifalar doirasidagi ushbu loyiha mintaqaviy raqamli iqtisodiyotni rivojlantirish, innovatsion sohalarni shakllantirish hamda iqtidorli mutaxassislarni tayyorlash uchun mustahkam zamin yaratadi. Shuningdek, u Oʻzbekiston va Xitoy oʻrtasida raqamli iqtisodiyot, raqamli sanoat infratuzilmasi hamda texnologik hamkorlik aloqalarini yanada mustahkamlashga xizmat qiladi.

EPC+F modeli asosida barpo etilayotgan IT sanoati inkubator binolari loyihalash, dizayn, xarid, qurilish va moliyalashtirish jarayonlarini yagona tizimda qamrab oladi. Loyihani rejalashtirish, tizimlashtirish, muhandislik boshqaruvi hamda xavfsizlik standartlariga rioya etish ishlari milliy qonunchilik talablari va xalqaro muhandislik amaliyotiga toʻliq muvofiq tarzda amalga oshiriladi.

Majmuada startap loyihalarni qoʻllab-quvvatlash, zamonaviy bilim va koʻnikmalarga ega kadrlarni tayyorlash uchun zarur barcha shart-sharoitlar yaratiladi. Bu esa hududda axborot texnologiyalari sohasini jadal rivojlantirish, yangi ish oʻrinlari yaratish hamda iqtisodiyot tarmoqlarining raqobatbardoshligini oshirishga xizmat qiladi.

Abdulaziz YOʻLDOSHEV, “Xalq soʻzi”.