2024-yilgi tinchlik boʻyicha Nobel mukofoti Xirosima va Nagasakidagi atom portlashlarida omon qolganlardan tashkil topgan Yaponiyaning yadro qurollanishga qarshi kurash guruhi Nihon Hidankyoga berildi. Bu haqda “France24” xabar berdi.

“Hibakusha” nomi bilan ham tanilgan bu ommaviy harakat yadroviy quroldan xoli dunyoni targʻib qilish borasidagi saʼy-harakatlari uchun ushbu mukofotga sazovor boʻldi. Guruh insoniyat yadro qurolidan boshqa hech qachon foydalanmaslik kerakligini koʻrsatish uchun aynan yadro portlashidan tirik qolgan aʼzolarni jalb etishdan foydalanishgan.

Nobel qoʻmitasi raisi Yorgen Vatne Fridnesning taʼkidlashicha, mukofot “yadro qurolidan foydalanishga qarshi norozilik”ni bildiradi. Nihon Hidankyo uzoq vaqtdan beri qurolsizlanish tarafdori boʻlib, kelajak avlodlar yadro urushi dahshatlarini boshdan kechirmasligi uchun tinimsiz mehnat qilib keladi.

Yadro qurolini cheklash va unga qarshi noroziligini bildirish harakatlari avval ham Nobel qoʻmitasi tomonidan taqdirlangan. Xususan, 2017-yilda yadro qurollarini cheklash boʻyicha xalqaro kampaniya Tinchlik mukofotiga sazovor boʻlgandi.

Tinchlik uchun Nobel mukofoti sovrindorlari, boshqa Nobel mukofotlari singari, 11 million shved kroni (taxminan 1,1 million AQSH dollar) miqdoridagi pul mukofoti bilan taqdirlanadi. Nobel mavsumi kelasi dushanba kuni iqtisodiyot boʻyicha mukofot eʼlon qilinishi bilan yakunlanadi.