Prezidentimiz Shavkat Mirziyoyev tashabbusi bilan poytaxtimizda qad rostlayotgan Oʻzbekistondagi Islom sivilizatsiyasi markazi mamlakatimizda diniy qadriyatlar, azaliy anʼanalarimizni ilmiy, maʼrifiy asosda oʻrganishga qaratilgan saʼy-harakatlarning amaliy ifodasi sifatida namoyon boʻlmoqda, desak aslo yanglishmaymiz.

Kuni kecha Oʻzbekiston Respublikasi davlat mustaqilligining oʻttiz yillik bayramiga tayyorgarlik koʻrish va uni yuqori saviyada oʻtkazishga doir Oliy Majlis Qonunchilik palatasi tomonidan amalga oshiriladigan tadbirlarni tashkillashtirish boʻyicha Ishchi guruhi aʼzolari sifatida qadimiy meʼmorchilik yechimlari va zamonaviy dizayn uygʻunlashtirilib barpo etilayotgan ushbu markazda olib borilayotgan qurilish ishlari bilan tanishib, bunga yana bir karra amin boʻldik.

7,5 gektar maydonning 2 gektari Hazrati imom majmuasi qatorida markazning mahobatli binosi qad rostlayapti. Mohir quruvchi va ustalar mehnati evaziga koʻkka boʻy choʻzayotgan uch qavatli moʻjizaning birinchisida 300 ta avtomobilga moʻljallangan maydon, ikkinchi qavatdan asrlar qaʼridan oʻzlashtirilib, jon ato etilgan nodir sanʼat koʻrgazma asarlar aks etgan media markaz, muzey hamda eksponatlar oʻrin oladi. Uchinchi qavatga oʻquv korpusi joylashtiriladi. Bu yerda ilmu toliblar Islom akademiyasining magistr va doktorantlari ilmiy izlanishlar olib borishlari mumkin boʻladi. Jahon miqyosida nufuzga ega xalqaro tashkilot va mashhur olimlar shu chorrahada toʻplanib, dunyo fanlaridan bahsga kirishadilar. Ushbu munavvar dargohda tafakkurlar charxlanadi.

Prezidentimiz taʼbiri bilan aytganda, markaz “haqiqiy aql markazi” maqomiga ega boʻladi. Binobarin, loyihaga koʻra, ushbu markazda akademiya, 200 ming turli kitoblarni oʻz javoniga joylash imkoni yaratilgan kutubxona, arxiv va qoʻlyozmalar fondi tashkil etiladi. Ularni bugungi Oʻzbekiston zaminidan yetishib chiqqan buyuk mutafakkirlar va ulamolar tomonidan asos solingan ilmiy va diniy maktablarga doir yurtimizda va chet ellarda saqlanayotgan qadimiy qoʻlyozma va toshbosma kitoblar, tarixiy dalil va hujjatlar, arxeologik topilmalar, osori-atiqalar, shu yoʻnalishdagi zamonaviy ilmiy-tadqiqot ishlari, video va foto hujjatlar bilan boyitish, 350, zaruratga qarab 500 oʻrinli konferensiya zali barpo etish koʻzda tutilgan. Bir soʻz bilan aytganda, ushbu markaz islomshunos olimlarning oʻz ilmiy salohiyatlarini oshirishlari va yangi izlanishlarini roʻyobga chiqarishlari uchun nurli manzil sifatida faoliyat yuritadi.

Uning toʻrtinchi qavati ham boʻsh turmaydi. U yerda milliy anʼanalarimiz aks etgan yashil bogʻ, dam olib tafakkurni charxlash uchun sharoit yaratiladi.

Bunyodkorlik ishlari davom etayotgan obyektda ish qizgʻin. Muqaddas dargoh hali bitmagan boʻlsada, allaqachon moziydan soʻzlayotir. Bu moʻjizaviy qadamjodagi muhit bizni bir zum xayollar olamiga, ezgulik gulshaniga yetaklaydi. Qalbingizdan ajib tuygʻular junbushga keladi, ruhiyatingiz tiniqlashadi.

Oʻyga tolamiz... Qadimdan qolgan ibora bor: “Tayanch nuqtasi topilsa, Yerni qoʻlda koʻtarish mumkin”. Diniy-maʼrifiy ilm nurlari endi shu nuqtadan taraladi. Endilikda oʻzbek xalqi oʻz ajdodlari merosidan bahramand boʻlish imkoniyatiga ega boʻlsa, koʻplab ilmu toliblar oʻz iqtidorlarini dunyoga mashhur qilishga erishadilar. Axir bundan quvonmay boʻladimi?

Davlatimiz rahbari markazning tashqi koʻrinishi, bu yerda ishlatiladigan qurilish materiallariga ham eʼtibor qaratish lozimligiga urgʻu berib, yangi shakl va dizayn topishimiz kerakligini taʼkidlagan edi.

Shu bois, markazda bu borada olib borilayotgan ishlar koʻlami nihoyatda kengaygan. Biz, deputatlarning markaz rahbariyati, ilmiy xodimlari bilan muloqotimiz juda qizgʻin kechdi. Olimlar zarur maʼlumotlarni bizga taqdim etdilar. Samimiy suhbatdan koʻnglimiz togʻdek koʻtarildi.

Xulosa qilib aytganda, mamlakatimizda soʻnggi yillarda barcha sohalarda amalga oshirilayotgan ishlar chin maʼnoda, eʼtirofga sazovor. Shu nuqtayi nazardan aytganda, Islom sivilizatsiyasi markazi ham buyuk ajdodlarimizning boy merosini oʻrganish, yosh ilm toliblarining ilmiy izlanishlarini dunyoga tanitishda katta oʻrin tutadi.

Navroʻz RIZAYEV,
Oliy Majlis Qonunchilik palatasi deputati