Ikkinchi jahon urushi qatnashchilari va faxriylarining moddiy taʼminotini yaxshilash hamda yolgʻiz keksalar va nogironligi boʻlgan shaxslarni qoʻllab-quvvatlash tizimini yanada takomillashtirish toʻgʻrisida

21:47 08 Iyun 2022 Hujjatlar
2534 0

Foto: president.uz

Oʻzbekiston Respublikasi Prezidentining qarori

Ikkinchi jahon urushi faxriylari, fashistlar konslagerlarining voyaga yetmagan sobiq mahbuslari va Leningrad shahri qamal qilingan davrda ishlagan fuqarolar, keksalar, nogironligi boʻlgan shaxslarni manzilli ijtimoiy himoya qilishni kuchaytirish, ularga koʻrsatilayotgan ijtimoiy xizmatlar sifatini yanada oshirish hamda ushbu fuqarolarni davlat tomonidan qoʻllab-quvvatlashning shaffof va samarali mexanizmlarini joriy etish maqsadida:

1. Shunday tartib oʻrnatilsinki, unga muvofiq:

1941-1945-yillardagi urush faxriylari va fashistlar konslagerlarining voyaga yetmagan sobiq mahbuslari va Leningrad shahri qamal qilingan davrda ishlagan fuqarolarga, shuningdek, oʻzgalar parvarishiga muhtoj boʻlgan yolgʻiz keksalar va nogironligi boʻlgan shaxslarga bepul yetkazib beriladigan oziq-ovqat mahsulotlari hamda gigiyena tovarlari oʻrniga har oyda bazaviy hisoblash miqdorining bir baravari miqdorida qoʻshimcha toʻlov (keyingi oʻrinlarda – qoʻshimcha toʻlov) toʻlab boriladi;

1941-1945-yillardagi urush faxriylari va fashistlar konslagerlarining voyaga yetmagan sobiq mahbuslari va Leningrad shahri qamal qilingan davrda ishlagan fuqarolarga bepul yetkazib beriladigan zarur kiyim-kechak va poyabzallar oʻrniga kiyim-kechak xaridi uchun har yili avgust oyida bazaviy hisoblash miqdorining 15 baravari miqdorida toʻlanadigan kompensatsiya (keyingi oʻrinlarda – kompensatsiya) joriy etiladi.

Bunda, qoʻshimcha toʻlov Tibbiy-ijtimoiy xizmatlarni rivojlantirish agentligi tomonidan pensiyalarni va nafaqalarni tayinlashga masʼul boʻlgan tashkilotga oʻzgalar parvarishiga muhtoj boʻlgan yolgʻiz keksalar yoki nogironligi boʻlgan shaxslar toʻgʻrisida taqdim etiladigan maʼlumotlar asosida amalga oshiriladi.

Belgilansinki, kompensatsiya va qoʻshimcha toʻlovlar mazkur bandda keltirilgan shaxslarga, ularning pensiyalari va nafaqalari toʻlanadigan tartibda toʻlanadi.

2. Qoʻshimcha toʻlov va kompensatsiyalarni moliyalashtirish quyidagilar:

a) Pensiya jamgʻarmasi hisobida turgan pensiya va nafaqa oluvchilarga:

qoʻshimcha toʻlovlar – Pensiya jamgʻarmasi mablagʻlari;

kompensatsiyalar – Oʻzbekiston Respublikasining respublika byudjeti mablagʻlari;

b) Mudofaa vazirligi, Ichki ishlar vazirligi, Favqulodda vaziyatlar vazirligi, Davlat xavfsizlik xizmati, Oʻzbekiston Respublikasi Prezidenti davlat xavfsizlik xizmati, Oliy sud, Konstitutsiyaviy sud, Sudyalar oliy kengashi, Bosh prokuratura, Elektron texnologiyalarni rivojlantirish markazi, Milliy gvardiya va Davlat bojxona qoʻmitasi tomonidan tayinlangan pensiya va nafaqalarni oluvchilarga qoʻshimcha toʻlovlar va kompensatsiyalar mazkur vazirlik va idoralarga ajratilgan byudjet mablagʻlari hisobidan amalga oshirilsin.

3. Moliya vazirligi ushbu qarorda koʻzda tutilgan tadbirlarni amalga oshirish uchun zarur boʻlgan mablagʻlar 2022-yilda Davlat byudjeti parametrlarida 1941-1945-yillardagi urush faxriylari va fashistlar konslagerlarining voyaga yetmagan sobiq mahbuslari va Leningrad shahri qamal qilingan davrda ishlagan fuqarolarga, shuningdek, oʻzgalar parvarishiga muhtoj boʻlgan yolgʻiz keksalar va nogironligi boʻlgan shaxslarga bepul yetkazib beriladigan oziq-ovqat mahsulotlari, gigiyena tovarlari va kiyim-kechaklar uchun nazarda tutilgan mablagʻlarning cheklangan miqdorlari doirasida ajratilishini taʼminlasin.

4. Iqtisodiy taraqqiyot va kambagʻallikni qisqartirish vazirligi, Mahalla va nuroniylarni qoʻllab-quvvatlash vazirligi, Oila va xotin-qizlar davlat qoʻmitasi, Yoshlar ishlari agentligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari mazkur qarorning 1-bandida keltirilgan imtiyozli toifadagi shaxslarga mahalliy byudjet, “Saxovat va koʻmak” jamgʻarmasi, “Yoshlar daftari”ga kiritilgan yoshlarni qoʻllab-quvvatlash jamgʻarmasi va “Ayollar daftari” roʻyxatiga kiritilgan xotin-qizlarni qoʻllab-quvvatlash jamgʻarmasi mablagʻlari hisobidan qoʻshimcha ravishda moddiy koʻmak va ijtimoiy yordam koʻrsatib borishni taʼminlasin.

5. Oʻzbekiston Milliy axborot agentligi, Oʻzbekiston Milliy teleradiokompaniyasi, Axborot va ommaviy kommunikatsiyalar agentligi ushbu qarorning maqsad va vazifalari bosma va elektron axborot vositalarida, shu jumladan, Internet jahon axborot tarmogʻi orqali aholi oʻrtasida muntazam, tizimli va keng koʻlamda yoritib borilishini taʼminlasin.

6. Moliya vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

7. Mazkur qaror ijrosini samarali tashkil qilishga masʼul va shaxsiy javobgar etib moliya vaziri T.A.Ishmetov belgilansin.

Qaror ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Bosh vazirining oʻrinbosari J.A.Qoʻchqorov zimmasiga yuklansin.

 

Oʻzbekiston Respublikasi Prezidenti                                     Sh.MIRZIYOYEV

 

Toshkent shahri,

2022-yil 8-iyun

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?