Bosh prokuratura huzuridagi Departamentning Gʻallaorol tumani boʻlimi, DXX va IIB xodimlari hamkorligida tezkor tadbir oʻtkazildi, deb xabar bermoqda Iqtisodiy jinoyatlarga qarshi kurashish departamenti.

Maʼlum qilinishicha, oʻtkazilgan tezkor tadbir davomida dori vositalarining noqonuniy savdosi bilan shugʻullanib kelgan Gʻ.J. fuqaro M.X.ga 56 dona kuchli taʼsir qiluvchi dori vositasini 12 million soʻmga sotgan vaqtida ashyoviy dalillar bilan qoʻlga olingan.

Shu kabi yana bir holat, Departamentning Nurafshon shahri boʻlimi va IIB xodimlari hamkorligida oʻtkazilgan tezkor tadbirda ham aniqlangan.

Unga koʻra, fuqarolar D.V. va Ye.R. fuqaro A.A.ga 20 dona kuchli taʼsir qiluvchi dori vositasini 1 million 600 ming soʻmga sotgan vaqtida ashyoviy dalillar bilan ushlangan.

“Mazkur holatlar yuzasidan Jinoyat kodeksining 251-1-moddasi (giyohvandlik vositalari, ularning analoglari yoki psixotrop moddalar hisoblanmaydigan kuchli taʼsir qiluvchi moddalarni targʻib qiluvchi mahsulotni tayyorlash, tarqatish, reklama qilish, namoyish etish yoki bunday moddalarni yoxud zaharli moddalarni qonunga xilof ravishda muomalaga kiritish) bilan jinoyat ishlari qoʻzgʻatilib, tergov harakatlari oʻtkazilmoqda”, — deyiladi departament xabarida.