Oʻzbekiston terma jamoasiga nomzod dzyudochilar Suhrob Rajabov va Rinata Ilmatova jarohat sabab musobaqalarda ishtirok eta olmayotgandi.

Shifokorlar har ikki dzyudochimizga tizza boʻgʻimining oldingi ikssimon bogʻlami shikastlanishi tashxisini qoʻyishgan edi. 

Oʻzbekiston dzyudo federatsiyasi matbuot xizmati xabariga koʻra, kuni kecha chexiyalik malakali xirurg Yuriy Luboyatski dzyudochilarimizda jarrohlik amaliyotini muvaffaqiyatli tarzda oʻtkazdi.

Bundan tashqari, toʻrt kun davomida boshqa sport turi vakillarining jarrohlik amaliyoti ham oʻtkazildi. Operatsiyalarda terma jamoamiz shifokori Aziz Qayumov ham bevosita ishtirok etdi.

Kecha Yuriy Luboyatski Oʻzbekiston dzyudo federatsiyasida mehmon boʻldi. Unda federatsiya bosh kotibi Ulugʻbek Kabulov chexiyalik mutaxassisga MOQ raisi oʻrinbosari, mamlakat dzyudo federatsiyasi raisi Azizjon Kamilovning tashakkurnomasi hamda esdalik sovgʻalarini taqdim etdi.