Foto: president.uz

Prezident huzurida standartlashtirish va sertifikatlashtirish sohalariga bagʻishlangan yigʻilish boʻlib oʻtmoqda. Bu haqda Prezident matbuot kotibi Sherzod Asadov xabar berdi.

Yigʻilishda quritilgan mevani eksport qilish uchun 27 xil turdagi tahlil qilinadigan laboratoriya talab etilishi, lekin birorta ham bunday laboratoriya yoʻqligi, toʻqimachilik mahsulotlarini Yevropa bozoriga olib kirish uchun zarur boʻlgan 61 ta laboratoriya tahlilining 16 tasi bizda yoʻlga qoʻyilmagani tanqid qilindi.

Eng muhimi, tadbirkor bu muammolardan mahsulotini Yevropaga olib borgandan keyin xabar topyapti. Texnik jihatdan tartibga solish agentligi, Oʻsimliklar karantini va himoyasi agentligi, Veterinariya va chorvachilikni rivojlantirish davlat qoʻmitasi, Sanitariya-epidemiologik osoyishtalik va jamoat salomatligi xizmati tadbirkorlar bilan ishlash, oʻqitish, muloqotni yoʻlga qoʻymagani koʻrsatib oʻtildi.

Shu munosabat bilan ushbu idoralar rahbarlari oldiga 20 mingta ishlab chiqaruvchi tadbirkorlar bilan ishlab, yil yakuniga qadar Yevropaga eksport qiluvchi korxonalar sonini 2 mingtaga koʻpaytirish vazifasi qoʻyildi.

Ularga bir oy muddatda qaysi standartni joriy qilish, qaysi laboratoriyani yangilash boʻyicha dastur ishlab chiqish topshirildi.