“Oʻzgidromet” joriy oyning oxiri va 1-2-oktyabr kunlari kuzatiladigan ob-havo maʼlumotlarini eʼlon qildi.

Unga koʻra, sentyabr oyining oxirgi kunlarida Oʻzbekiston hududi boʻyicha asosan quruq va iliq ob-havo saqlanib turadi, harorat 26-29 daraja, baʼzi joylarda 31 darajagacha boʻladi. 1-2-oktyabrda respublikaning barcha hududlariga Qozogʻistondan salqin va nam havo kirib keladi.

1-oktyabrda Qoraqalpogʻiston Respublikasida, Navoiy va Toshkent viloyati shimolida baʼzi joylarda yomgʻir yogʻadi. 2-oktyabrda Fargʻona vodiysi viloyatlarida, shuningdek Toshkent, Samarqand, Jizzax va Sirdaryo viloyatlarida kechasi va ertalab yomgʻir yogʻishi kutilmoqda. 3-oktyabrda faqat Fargʻona vodiysida ayrim joylarda yomgʻir yogʻishi saqlanib turadi.

Harorat foni 1-2-oktyabrda 8-10 darajaga pasayadi. Kechasi va ertalab termometr ustuni 8-13 darajagacha pasayadi, kunduz kunlari esa havo harorati 18-23 darajadan yuqori boʻlmaydi. Respublika shimolida harorat kechalari 4-9 daraja iliqqacha, kunduz kunlari 15-18 darajagacha pasayadi. 3-oktyabrda respublika hududining katta qismida kunduzgi harorat 2-3 darajaga koʻtariladi.

Respublika janubida bunday iliq ob-havo 1-oktyabrgacha saqlanib turadi, 2-3-oktyabrdan esa harorat 20-25 darajagacha pasayadi. Oʻzbekiston boʻyicha baʼzi joylarda shamol tezligi 13-18 m/s gacha kuchayishi, ayrim joylarda chang-toʻzonlar bilan kuzatilishi mumkin.