Qishloq xoʻjaligida bilim va innovatsiyalar milliy markazida Oliy Majlisi Senati, Qonunchilik palatasi, Qishloq xoʻjaligi vazirligi, Toshkent davlat agrar universiteti hamda Oʻzbekiston “Agrar soha ayollari” uyushmasi hamkorligida “Global iqlim oʻzgarishi sharoitida oziq-ovqat va mahsulotlar xavfsizligini taʼminlash orqali Barqaror rivojlanish maqsadlariga erishish” mavzusida ilmiy-amaliy konferensiya boʻlib oʻtdi.

Tadbirda senatorlar va deputatlar, vazirlik va idoralar masʼullari, olimlar, oliy taʼlim muassasalari professor-oʻqituvchilari, xalqaro va nodavlat tashkilotlar vakillari, shuningdek, agrar sohada faoliyat yuritayotgan mutaxassislar ishtirok etdi.

Konferensiyada global iqlim oʻzgarishining qishloq xoʻjaligi va oziq-ovqat tizimlariga taʼsiri, mahsulotlar xavfsizligini taʼminlashda ilm-fan va innovatsiyalarning oʻrni, barqaror agrotexnologiyalarni joriy etish, resurslardan oqilona foydalanish masalalari muhokama qilindi.

Shuningdek, iqlim oʻzgarishi sharoitida oziq-ovqat xavfsizligini mustahkamlash, ayollarning agrar sohadagi faolligini oshirish, ilmiy-tadqiqot natijalarini amaliyotga tatbiq etish orqali Barqaror rivojlanish maqsadlariga erishish boʻyicha taklif va tavsiyalar ilgari surildi.

Tadbir yakunida bildirilgan fikr va mulohazalar asosida tegishli xulosa va takliflar ishlab chiqilishi qayd etildi.