Illyustrativ foto

Istam IBROHIMOV/“Xalq soʻzi”. Buxoro viloyati Gʻijduvon tumanidagi Guliston mahalla fuqarolar yigʻini hududida yashovchi 94 yoshli Risolat Sharipova soliq boʻyicha imtiyozlar uchun arizani uyida turib topshirish imkoniga ega boʻldi. Tuman adliya boʻlimi tomonidan unga sayyor tarzda xizmat koʻrsatilib, elektron imzo kaliti olib berildi.

— Fuqarolar tashvishini yengil qilish, odamlarga u yoki bu masalada tezkor yordam koʻrsatish ish faoliyatimizning asosiy yoʻnalishlaridan sanaladi, — deydi viloyat adliya boshqarmasi masʼul xodimi Bekzod Rahmonov. — Shu nuqtayi nazardan yaqinda oʻtkazilgan “Hech bir shaxs hujjatsiz qolmaydi” aksiyasi koʻplab fuqarolarni ovoragarchilikdan xalos etish, ularning qimmatli vaqt hamda mablagʻlarini tejashda qoʻl keldi. Xususan, sayyor qabullar va sayyor davlat xizmatlari tashkil etilgani ayni muddao boʻldi. Ular orqali aholiga 10 ming 536 ta sayyor davlat xizmati koʻrsatildi.

Bugina emas, mahallarda oʻtkazilgan xatlov ishlari davomida qonuniy nikohdan oʻtmasdan yashab kelayotgan 174 ta oilalar aniqlandi. Tabiiyki, ularning nikohi belgilangan tartibda qayd qilindi. 888 nafar shaxsga ID-karta rasmiylashtirildi. 2 185 ta tadbirkorlik subyekti, 1 088 ta koʻchmas mulk obyekti davlat roʻyxatidan oʻtkazildi.