Poytaxtimizdagi “Central Asian Expo CAEx” xalqaro koʻrgazmalar majmuasida tashkil etilgan matbuot anjumanida “Business Media Central Asia Uzbekistan” (“BMCA Uzbekistan”) vakilligida Oʻzbekistonda Germaniyaning “Messe Frankfurt” koʻrgazma kompaniyasining vakolatxonasi va rasmiy ofisi ochilishi eʼlon qilindi.

Tadbirda nufuzli xalqaro kompaniyalar vakillari, jumladan, “Messe Frankfurt Group”, “Business Media Europe”, “BMCA Uzbekistan”, “CAEx” kompaniyalari rahbarlari va boshqalar qatnashdi.

Anjumanda “BMCA Uzbekistan” “Messe Frankfurt” xalqaro koʻrgazma konsernidan Oʻzbekistonda yirik koʻrgazmalarni tashkil qilish uchun akkreditatsiya olganligi eʼlon qilindi. Endi “Automechanika”, “Futuroad”, “Scalex”, “Heimtextile”, “Texworld”, “Apparel Sourcing” va “BeautyWorld” kabi xalqaro koʻrgazmalar “CAEx” hududida oʻtkazilishi mumkin.

“Messe Frankfurt Group” vitse-prezidenti Stefan Kursavski tadbirdagi nutqida kompaniyaning mintaqadagi faoliyati kengayishiga ishonch bildirib, Oʻzbekiston Sharq va Gʻarb oʻrtasida koʻprik vazifasini oʻtashini qayd etdi. Koʻrgazmalarning oʻtkazilishi sarmoya jalb etish, sanoatni rivojlantirish va mamlakatda ishbilarmonlik muhitini yaxshilashga xizmat qiladi.

1907-yilda asos solingan “Messe Frankfurt Group” bugungi kunda dunyodagi eng yirik koʻrgazma va tadbirlar tashkil etish konserni hisoblanadi. Har yili 100 dan ortiq xalqaro koʻrgazmalar va qariyb 2500 kishilik ishchi kuchi bilan u tadbirlar bozorida katta tajriba va obroʻga ega.