Oʻzbekiston milliy terma jamoasi va “SSKA” klubi yarim himoyachisi Abbosbek Fayzullayev Germaniyaning “Bavariya” klubiga oʻtishi mumkin. Bu haqida “Bombardir” nashri xabar berdi.

Soʻnggi maʼlumotlarga koʻra, “Bavariya” klubi Fayzullayevning “SSKA” hamda milliy jamoadagi oʻyinlarini diqqat bilan kuzatib bormoqda. Jarayon ijobiy yakunlanadigan boʻlsa, futbolchimiz yozgi transferlar oynasidayoq “Bavariya” tarkibiga borib qoʻshilishi mumkin.

Maʼlumki, “SSKA” klubi Fayzullayevni 2023-yilning yozida 500 ming yevro evaziga oʻz tarkibiga qoʻshib olgan edi. Oʻzbekiston milliy terma jamoasi futbolchisining Rossiya klubi bilan amaldagi shartnomasi 2026-yil yozigacha amal qiladi.

"Transfermarkt" internet portalida keltirilgan maʼlumotga koʻra, Abbosbek Fayzullayevning ayni paytdagi qiymati 8 million yevroni tashkil qilmoqda.

Maʼlumot uchun, Fayzullayev ushbu mavsumda “SSKA” klubi tarkibida 23 oʻyinda maydonga tushib, 3 gol hamda 6 assit qayd etdi.

Eslatib oʻtamiz, avvalroq, taniqli futbol agenti Anton Smirnov Abbosbek Fayzullayev yoshlar terma jamoasida oʻynagan davrdan buyon “Bavariya” klubi kuzatuvida ekanini oʻz ijtimoiy tarmoqlardagi sahifalarida maʼlum qilgan edi.