Samarqand va Toshkentda fuqarolarni chet davlatlarga ishga yuborishni vaʼda qilgan firibgarlar qoʻlga olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Departamentning Samarqand shahri boʻlimi tomonidan oʻtkazilgan tergovga qadar tekshiruvda “S.S” MCHJ taʼsischisi O.Oʻ. va ish boshqaruvchisi S.R. internet ijtimoiy tarmogʻida xorijiy davlatlarga ishga yuborishlari haqida eʼlon berib, 6 nafar fuqaroni Germaniya va Angliya davlatlariga ishga yuborishlari evaziga ularning jami 12 700 AQSH dollarini firibgarlik yoʻli bilan qoʻlga kiritganliklari aniqlangan.

Shu kabi, Departamentning Uchtepa tumani boʻlimi, DXX va IIV xodimlari hamkorligida oʻtkazilgan tezkor tadbirda fuqaro Ye.M. fuqaro I.S. va uning 4 nafar tanishlarini 12 000 AQSH dollari evaziga Germaniya davlatiga borishi uchun viza olib berishini aytib, shundan 6 000 AQSH dollarini firibgarlik yoʻli bilan olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (firibgarlik) bilan jinoyat ishlari qoʻzgʻatilib, tergov harakatlar oʻtkazilmoqda.