Gʻuzor tumani va Shahrisabz shahridagi ikkita politexnikumda oʻtgan yili Germaniyaning “Avestos” kompaniyasi va Leypsig shahar Hunarmandchilik palatasi bilan hamkorlikda qurilish va elektr payvandlash yoʻnalishlari boʻyicha toʻliq nemis taʼlim standartlari asosida oʻqitish yoʻlga qoʻyilgan edi.

Yangi oʻquv yilidan viloyatdagi yana 4 ta politexnikumda nemis taʼlim standartlari joriy etildi. Buning uchun ushbu muassasalarda barcha shart-sharoit yaratilib, oʻquv-amaliyot xonalari zarur texnologiyalar, uslubiy qoʻllanmalar bilan jihozlandi.

“Avestos” kompaniyasi rahbari Miksel Klaus boshchiligidagi delegatsiya mazkur taʼlim muassasalariga tashrif buyurib, nemis standartlari asosida taʼlim berish huquqini tasdiqlovchi guvohnomalarni tantanali ravishda topshirdi.

— Bugun nafaqat Germaniya, balki yurtingizda ham qurilish, metallga ishlov berish, elektr payvandlash singari sohalarda yuqori malakali mutaxassislarga boʻlgan talab oshib bormoqda, — deydi Miksel Klaus. — Hamkorlikdagi ushbu loyihaning maqsadi ana shunday mutaxassislar tayyorlashga qaratilgan.

Jahongir BOYMURODOV

“Xalq soʻzi”.