Foto: FVV

Oʻzbekiston Respublikasi Prezidentining qarori bilan Favqulodda vaziyatlar vaziriga ikki nafar oʻrinbosar tayinlandi. Bu haqda vazirlik axborot xizmati xabar berdi.

Qayd etilishicha, Sotiyev Xurshid Toʻlqinboyevich Oʻzbekiston Respublikasi Favqulodda vaziyatlar vazirining oʻrinbosari — Favqulodda vaziyatlar profilaktikasi departamenti boshligʻi vazifasini bajaruvchi lavozimiga tayinlangan.

Maʼlumot uchun, Sotiyev Favqulodda vaziyatlar vazirligi tizimida turli lavozimlarda faoliyat yuritgan boʻlib, mazkur tayinlovga qadar FVV Shtab boshligʻining oʻrinbosari – qutqaruv kuchlarining xizmat va jangovar tayyorgarligini tashkil etish boshqarmasi boshligʻi lavozimida faoliyat yuritgan.

Bundan tashqari, Qodirov Nuriddin Bahriddinovich Oʻzbekiston Respublikasi Favqulodda vaziyatlar vazirining oʻrinbosari – Maʼnaviy-maʼrifiy ishlar va kadrlar bilan taʼminlash departamenti boshligʻi vazifasini bajaruvchi lavozimiga tayinlangan.

Qodirov ushbu tayinlovga qadar Markaziy harbiy okrugi qoʻshinlari qoʻmondonining tarbiyaviy va mafkuraviy ishlar boʻyicha oʻrinbosari lavozimida faoliyat yuritgan. U faoliyati davomida Mudofaa vazirligi tizimida turli lavozimlarda xizmat olib borgan.