Professional boksning super yengil (-63,5 kg) vazn toifasida ringga chiqayotgan hamyurtimiz Fazliddin Gʻoyibnazarov jumadan shanbaga oʻtar kechasi oʻzining navbatdagi jangini oʻtkazdi. AQSHning Nyu-York shahridagi Verona shaharchasida tashkil etilgan boks kechasida hamyurtimiz Dominikan Respublikasi vakili Rikardo Garsiyaga qarshi ringga koʻtarildi.

Jami 8 raundga moʻljallangan jang atigi 4 raund davom etdi. Negaki 4-raund yakuniga yetgach Garsiya jangni davom ettira olmasligini bildirdi va mazkur holatda magʻlub tomonga texnik nokaut yoziladi. Bungacha Fazliddin raqibini 3-raundda nokdaun holatiga tushirgan edi.

Shu tariqa Gʻoyibnazarov professional boksda oʻzining yettinchi gʻalabasiga erishdi. Bungacha u oʻtkazilgan oltita jangini ham oʻz foydasiga hal qilgandi. Shundan toʻrttasida raqiblarini nokautga uchratgan.

Rikardo Garsiya esa 20 marta ringga koʻtarilgan boʻlib, shundan 14tasida gʻalaba qozongan (9tasi nokaut). Besh marotaba esa magʻlubiyatga uchragan. Hamyurtimizga qarshi kechgan bahsda u faoliyatidagi birinchi nokautli magʻlubiyatni qabul qilib oldi.