Fargʻona viloyatida sifati kafolatlanmagan dori vositalari va tibbiy buyumlarning noqonuniy muomalaga kiritilishining oldi olindi. Bosh prokuratura huzuridagi Iqtisodiy jinoyatlarga qarshi kurashish departamentining Uchkoʻprik tumani boʻlimi tomonidan oʻtkazilgan ushbu tadbirda qonunbuzarlik fosh etilgan. Bu haqda Departamentning matbuot xizmati xabar berdi.

Tadbir chogʻida fuqaro S.X. turli nomdagi va hech qanday tegishli hujjatlari mavjud boʻlmagan, 38 turdagi jami 15 ming 360 dona dori vositalari va tibbiy buyumlarni umumiy 145 million soʻmga sotgan vaqtida ashyoviy dalillar bilan qoʻlga olindi. Mazkur vositalar qonuniy tarzda roʻyxatdan oʻtkazilmagan va savdoga chiqarilishi man etilgan boʻlgan.

Oʻrganishlar natijasida fuqaro S.X. dori vositalari va tibbiy buyumlarning muomalaga kiritilishida belgilangan tartiblarni buzgani aniqlanib, unga nisbatan Oʻzbekiston Respublikasi Jinoyat kodeksining 186-3-moddasi bilan jinoyat ishi qoʻzgʻatildi. Ushbu modda sifatsiz yoki qalbakilashtirilgan dori vositalari yoki tibbiy buyumlarni tayyorlash, saqlash va tarqatish bilan bogʻliq harakatlar uchun javobgarlikni nazarda tutadi.

Ayni vaqtda mazkur holat yuzasidan tergov harakatlari olib borilmoqda. Mutasaddi organlar tomonidan farmatsevtika sohasidagi qonunbuzarliklarni bartaraf etish, aholining sogʻligʻiga tahdid soluvchi noqonuniy faoliyatlarga qarshi kurashish ishlari izchil davom ettirilyapti.