Botir MADIYOROV/“Xalq soʻzi”. “Qadriyatlaring boqiy boʻlsin, Navroʻz!” degan bosh gʻoyani oʻzida mujassam etgan bu yilgi yasharish va yangilanish ayyomi saxovatli tadbirkorlarimizni yordamga muhtoj oilalarga muruvvat koʻrsatishga ragʻbatlantirayotgani eʼtiborga sazovordir.

Oltiariq tumanining “Qahramon” mahalla fuqarolar yigʻini hududida istiqomat qilayotgan tadbirkor Sherzodbek Bekmurodov yaqinda oʻz mablagʻi hisobidan mahallaga 600 metr masofada ichki yoʻl qurib berdi. Bunday qulaylik natijasida uzogʻi yaqin boʻlgan mahalladoshlar Navroʻzni yangi yoʻl quvonchi bilan kutib olmoqda.

Tadbirkor Sh. Bekmurodov qariyb 400 million soʻm mablagʻ sarflab, mahalladoshlari uchun toza ichimlik suvi ham chiqardi. Bugungi kunda hududdagi 250 xonadon shu suvdan damlangan koʻk choy bilan Navroʻz dasturxonini bezamoqda.

— Saxovatpesha tadbirkorlarimiz tashabbusi bilan yakka-yolgʻiz, boquvchisini yoʻqotgan mahalladoshimizga yangi uy qurib berildi, — deydi “Qahramon” MFY raisi Dilmurodjon Orifjonov. — Shu tariqa u Navroʻz bayramini yangi uyda qoʻshaloq shodiyona sifatida nishonlayotir.

Ayni kunlarda Ramazon oyi va Navroʻzi olam fazilatlaridan ruhlangan mahalladoshlar navbatdagi xayrli ishga qoʻl urib, yana bir ehtiyojmand oila uchun hashar yoʻli bilan uy qurib berish ishlarini yakuniga yetkazishmoqda. Mahalla raisining aytishicha, ushbu xonadondagi qurilish-taʼmirlash ishlarini hayit ayyomigacha yakunlash maqsad qilingan.

Demak, Navroʻz shukuhi va hayit shodiyonalari davom etadigan kunlarda yana bir oilaning nafaqat yashash xonadoni, balki koʻngil uyi ham obod boʻladi!