Jahon sogʻliqni saqlash tashkilotiga Yevropaning olti davlati — Buyuk Britaniya, Ispaniya, Italiya, Fransiya, Xorvatiya va Shvetsiyadan yangi tugʻilgan chaqaloqlarda ekxovirus-11 (E-11) bilan kasallanish holatlari koʻpayayotganiga doir xabarlar kelib tushdi.

Xususan, Fransiya sogʻliqni saqlash vazirligi shu yil may oyida mazkur infeksiya tufayli goʻdaklar oʻrtasida sepsisning ogʻir shakllari ortganini maʼlum qilgan.

Oqibatda bu yerda yetti nafar goʻdak hayotdan koʻz yumdi, yana ikki nafarining ahvoli ogʻir. Iyun oyidan boshlab esa Yevropaning boshqa mamlakatlarida ham infeksiyaga chalinish holatlari qayd etilgan.

Tahlillarga koʻra, 2016-yildan 2021-yilgacha dunyo boʻyicha chaqaloqlar oʻrtasida E-11 ni yuqtirish koʻrsatkichi boshqa yuqumli kasalliklarga qiyoslaganda 6,2 foizni tashkil etgan boʻlsa-da, oʻtgan yili bu raqamlar 55 foizgacha koʻtarilgan.

JSST garchi bu holatni aholi salomatligi uchun global xavf, deb baholamagan boʻlsa-da, shifokorlarni tekshiruv qamrovini oshirishga va ehtiyotkorlikka chaqirdi.

Eslatib oʻtamiz, ekxovirus — turli yuqumli xastaliklarni keltirib chiqaruvchi, oʻzida ribonuklein kislotalar saqlovchi enteroviruslar (ichak viruslari) guruhiga mansub.

U ichak, markaziy nerv tizimi, yurak va boshqa aʼzolarning zararlanishi bilan kechadigan turli kasalliklarga sabab boʻladi. Enteroviruslar tashqi muhitda uzoq vaqt yashash qobiliyatini saqlaydi, kislotaga chidamli.

Odatda xastalik yengil shaklda davom etadi. Ammo yangi tugʻilgan chaqaloqlarda infeksiya oʻtkir virusli gepatit, sepsis, meningit va qon ketishining buzilishi kabi kasallik va ogʻir asoratlarni keltirib chiqarishi mumkin.