Yetim bolalar va ota-ona qaramogʻidan mahrum boʻlgan bolalarni uy-joy bilan taʼminlash tartibi belgilandi

12:40 27 Oktyabr 2021 Hujjatlar
2299 0

Hukumat qarori (656-son, 25.10.2021-y.) bilan Yetim bolalar va ota-ona qaramogʻidan mahrum boʻlgan bolalarni uy-joy bilan taʼminlash tartibi toʻgʻrisidagi nizom tasdiqlandi.

Nizomga koʻra, yetim bolalar va ota-ona qaramogʻidan mahrum boʻlgan bolalarga uy-joylar viloyat hokimliklari tomonidan bozordagi koʻp kvartirali uylardan ajratiladi.

Bunda oʻquv-tarbiya muassasalari va tuman (shahar) hokimliklari bolalarni muassasada boʻlish muddati tugashidan bir yil avval uy-joyga muhtoj sifatida “onlayn-navbat”ga kiritib boradi.

Bolalarga 18 yoshga toʻlgan yilda:

koʻp kvartirali uy-joylardan umumiy maydoni 25 kvadrat metrdan kam boʻlmagan 1 xonali;

voyaga yetgan yetim bolalar va ota-ona qaramogʻidan mahrum boʻlgan bolalar oʻrtasida nikoh tuzilgan hollarda, 50 kvadrat metrdan kam boʻlmagan 2 xonali kvartiralar ajratiladi.

Uy-joylar mulkka egalik qilish huquqi asosida, biroq 30 yoshga toʻlgungacha uni sotish huquqisiz beriladi.

Nizomga koʻra, uy-joylar tuman hokimligi tomonidan ajratilib, yashash uchun barcha zarur sharoitlarga ega holda topshiriladi.

Uy-joy bilan taʼminlanish holati haqidagi maʼlumotlar har oyda yangilanadi va Xalq taʼlimi vazirligi rasmiy veb-saytida joylashtirib boriladi.

Uy-joy berish toʻgʻrisidagi qaror asosida tuman (shahar) hokimligi order beradi va ushbu order berilgan uy-joyga koʻchib kirish uchun asos hisoblanadi.

Orderlar “onlayn-navbat” axborot tizimidagi qatʼiy ketma-ketlik asosida beriladi.

Uy-joy order berilgan kundan 10 kundan kechikmay notarial rasmiylashtiriladi.

Qarorga koʻra shuningdek, 2022-yil 1-yanvardan:

● yetim bolalar va ota-ona qaramogʻidan mahrum boʻlgan bolalarning uy-joyga muhtojligi “Ijtimoiy himoya yagona reyestri” axborot tizimi orqali aniqlanadi;

● yetim bolalar va ota-ona qaramogʻidan mahrum boʻlgan bolalarni farzandlikka, vasiylikka (homiylikka, patronatga) olish “Vasiylik va homilik” elektron platformasi orqali onlayn murojaatga asosan amalga oshiriladi.

2022/2023 oʻquv yilidan “Ijtimoiy ish” bakalavriat taʼlim yoʻnalishida “Vasiylik” va “Homiylik” sohasi boʻyicha oliy maʼlumotli kadrlar tayyorlash yoʻlga qoʻyiladi.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?