1979-yilning 11-avgust sanasi oʻzbek futboli muxlislari uchun mudhish kun sifatida tarixga muhrlangan. Maʼlumki, oʻsha kuni SSSR oliy ligasida navbatdagi tur oʻyinini oʻtkazib qaytayotgan “Paxtakor” klubi aviahalokatga uchragan.

Oʻzbekiston futbol assotsiatsiyasi va “Paxtakor” klubi har yili ushbu sanada mazkur halokat qurbonlari xotirasiga bagʻishlab turli tadbirlar, xususan, afsonaviy futbolchilar oʻrtasida musobaqa oʻtkazib keladi. OʻFA matbuot xizmati xabariga koʻra, bu galgi bellashuv ertaga, 14-avgust kuni oʻtkazilishi rejalashtirilgan.

Unda Mirjalol Qosimov, Azamat Abduraimov, Baxtiyor Ashurmatov, Odil Ahmedov, Server Jeparov, Timur Kapadze, Ignatiy Nesterov, Ravshan Irmatov kabi nomlardan iborat Oʻzbekiston terma jamoasi Rossiya futboli afsonalariga qarshi maydonga tushadi.

Rossiya terma jamoasi tarkibida Rinat Dasayev, Dmitriy Alenichev, Valeriy Shmarov, Yegor Titov kabi futbol yulduzlari maydonga tushishi kutilmoqda.

Oʻzbekiston faxriylar terma jamoasiga mamlakat futboli afsonasi Birodar Abduraimov, Rossiya faxriylar termasiga Aleksandr Mirzayan bosh murabbiylik qiladi.

Mazkur bahs ertaga “JAR” stadionida boʻlib oʻtadi. Oʻyinga soat 19:00 da start beriladi.