Ertaga oʻqishni koʻchirish boʻyicha arizalar qabuli yakunlanadi. Bu haqida Taʼlim nazorati Telegram-kanali xabar berdi.

Maʼlumki, joriy yilning 10-yanvar kunidan bahorgi semestr uchun oʻqishni koʻchirish (qayta tiklash) boʻyicha arizalar qabuli boshlangan edi. Arizalar qabuli ertaga, 20-yanvar kuni yakunlanadi.

Arizalar quyidagi shakllarda:

• Oliy taʼlim, fan va innovatsiyalar vazirligining rasmiy “transfer.edu.uz” sayti;
• Yagona interaktiv davlat xizmatlari portali — “my.gov.uz” orqali onlayn qabul qilinishi mumkin.

Bahorgi semestr oldidan bir oliy taʼlim tashkilotidan boshqasiga “koʻchirib tiklash” boʻyicha arizalar qabul qilinmaydi.

1-bosqich (1-kurs) 1-semestriga oʻqishni koʻchirishga ruxsat etilmaydi (istisno holatlar bundan mustasno).

Ruxsat kimlarga beriladi?

• talaba oila qurishi munosabati bilan turmush oʻrtogʻi doimiy yashaydigan hududdagi oliy taʼlim muassasasiga oʻqishini koʻchirish istagidagilarga;
• davlat organlarining xodimlari ish joyi oʻzgargan taqdirda uning turmush oʻrtogʻi yoki voyaga yetmagan farzandi oʻqishini koʻchirmoqchi boʻlganlarga (tegishli vazirlik (idora) rahbarining tavsiyasi asosida).

Arizalar 21-yanvardan 10-fevralgacha koʻrib chiqiladi va natijasi yuzasidan talabgorlarga maʼlum qilinadi.