Bosh prokuratura huzuridagi Departamentning Oqqoʻrgʻon tumani boʻlimi va IIB xodimlari hamkorligida tezkor tadbir oʻtkazildi, deb xabar bermoqda Iqtisodiy jinoyatlarga qarshi kurashish departamenti.

Unga koʻra, oʻtkazilgan tezkor tadbirda fuqaro A.N.ga tegishli “Zarafshon” MFY hududidagi noturar binoda fuqaro O.R. tijorat maqsadida umumiy foydalanishdagi elektr tarmogʻiga toʻgʻridan-toʻgʻri ulanib, 224,7 million soʻmlik elektr energiyasidan noqonuniy foydalanganligi aniqlandi.

Shu kabi yana bir holat, Departamentning Boʻstonliq tumani boʻlimi tomonidan oʻtkazilgan tezkor tadbirda ham kuzatilgan.

Unda, fuqaro A.A. va boshqalar “Xodjikent” MFY hududidagi xonadonda tijorat maqsadida umumiy foydalanishdagi elektr tarmogʻiga toʻgʻridan-toʻgʻri ulanib, 141,1 million soʻmlik elektr energiyasidan noqonuniy foydalanganligi fosh boʻlgan.

Bundan tashqari, Departamentning Ohangaron tumani boʻlimi tomonidan oʻtkazilgan tergovga qadar tekshiruvda “S.Sh.” oilaviy korxonasi masʼul shaxslari “Yalpoqtepa” MFY hududidagi umumiy ovqatlanish shoxobchasida tijorat maqsadida umumiy foydalanishdagi gaz tarmogʻiga toʻgʻridan-toʻgʻri ulanib, 170 million soʻmlik tabiiy gazdan noqonuniy foydalanganliklari aniqlangan.

“Mazkur holatlar yuzasidan Jinoyat kodeksining 169-moddasi (oʻgʻrilik) bilan jinoyat ishlari qoʻzgʻatilib, tergov harakatlari oʻtkazilmoqda”, — deyiladi Departament xabarida.