YouTube videoxostingi ham AQSH prezidenti akkauntini kamida bir haftaga qulflab qoʻydi. Ushbu muddat yana uzaytirilishi mumkin, deb xabar berdi CNN.

Kanal bayonotiga koʻra, Trampning yaqinda chiqqan videosi “zoʻravonlikni kuchaytirib yuborgani” uchun tarmoqdan oʻchirildi.

Lekin ushbu qaror bir hafta oʻtib yana qayta koʻrib chiqiladi. Bundan oldin Twitter, Facebook va boshqa ijtimoiy tarmoqlar ham AQSH davlat rahbari sahifalarini nomaʼlum muddatga bloklab qoʻygani haqida xabar bergan edik. Zoʻravonlikka undash borasidagi ayblov bunga sabab qilib koʻrsatildi. 

Shundan soʻng Tramp mazkur cheklovlarni soʻz erkinligiga misli koʻrilmagan zarba deb atadi.

Xabaringiz bor, u 6-yanvar kuni Oq uyda boʻlib oʻtgan mitingda tarafdorlarini saylov natijalariga eʼtiroz bildirish, buning uchun Kapitoliyga borib, “kuchsiz respublikachilarga yordam berish”ga chaqirgandi. Shundan soʻng namoyishchilar kongress binosiga bostirib kirib, Jo Baydenning saylovdagi gʻalabasi tasdiqlangan qoʻshma sessiya ishini toʻxtatib qoʻygandi. 

Kongress aʼzolari esa zudlik bilan xavfsiz joyga koʻchirilib, bir necha soat tiqilinchda kutib turishga majbur boʻlishdi. 

Mazkur hujum oqibatida besh kishi halok boʻldi. Demokratlar esa vitse-prezident Mayk Pensdan oʻz huquqidan foydalangan holda Trampni muddatidan oldin lavozimidan chetlatish taklifini bildirishga hamon chaqirmoqda. Pens esa ularning daʼvatini rad etyapti. 

Ammo Demokratlarda zaxira rejasi ham bor. Ular Trampni isyon koʻtarishga undashda ayblab, uning impichmenti masalasini Vakillar palatasiga kiritishga qaror qilgan. Impichment masalasi bugun koʻrib chiqiladi.