Prezidentning tegishli qaroriga koʻra, 2022-yil 1-sentyabrdan boshlab tibbiyot tizimi rahbarlarining xalq deputatlari mahalliy Kengashlari hamda mahalla fuqarolar yigʻinlarida hisobot berish tartibi joriy qilinadi.

Endilikda:

— tuman va shahar koʻp tarmoqli markaziy poliklinikasi, oilaviy poliklinikalar hamda oilaviy shifokor punktlari mudirlari mahalla fuqarolar yigʻinlarida,

— tuman va shahar tibbiyot birlashmalari rahbarlari xalq deputatlari tuman (shahar) Kengashlarida,

— viloyat sogʻliqni saqlash boshqarmalari boshliqlari xalq deputatlari viloyat Kengashlarida hisobot beradi.

Shuningdek, 2022-yil 1-oktyabrga qadar birlamchi tibbiy-sanitariya yordami muassasalaridagi tibbiy jihozlar xatlovdan oʻtkaziladi.

Jumladan, nosoz tibbiy jihozlarni aniqlab, ularni soz holatga keltirish yoki yangisiga almashtirish uchun zarur mablagʻlar hisob-kitob qilinadi.

2022-yilda tibbiy jihozlar hisobini va nazoratini yuritish boʻyicha elektron platforma Sirdaryo viloyatida tajriba tariqasida, keyinchalik 2023-yildan boshqa hududlarda bosqichma-bosqich joriy etiladi.