Foto: Gettyimages.com

Italiya poytaxtidagi “Olimpiko” stadionida futbol boʻyicha Italiya chempionatining 2024/2025-yilgi mavsumi 2-tur uchrashuvi boʻlib oʻtdi. Unda “Roma” va “Empoli” klublari toʻqnash keldi.

Unda “boʻrilar” sharmandali magʻlub boʻldi. Birinchi boʻlim oxirida “Empoli” hujumchisi Lorenso Kolomboning uzatmasidan keyin Emmanuel Gyasi boshi bilan toʻpni darvozaga kiritdi. Ikkinchi gol esa uchrashuvning 61-daqiqasida Kolombo penaltini aniq amalga oshirib, hisobdagi farqni ikkitaga yetkazdi.

Hamyurtimiz Eldor Shomurodov bahsning 77-daqiqasida zahiradan maydonga tushdi. 4 daqiqa oʻtar-oʻtmas gol muallifi boʻldi. Tommaso Baldansi oshirgan toʻpni Eldor boshi bilan darvozaning pastki oʻng burchagiga joylab qoʻydi. Qolgan daqiqalarda “Roma” hisobda oʻzgarish qila olmadi va magʻlubiyatga uchradi.

Hamyurtimiz juda ajoyib oʻyin koʻrsatdi va bu Italiyada keng muhokamalarga sabab boʻldi. “Reddit” tarmogʻidagi muhokamada Shomurodovni jamoa uchun muhim oʻyinchi ekanligini, uni jamoa sardori qilish yaxshi ish boʻlishini aytgan boʻlsa, yana boshqa foydalanuvchilar uni “Oʻzbek Messi”si deb atashgan.

“Empoli” turnir jadvalida oltinchi oʻringa koʻtarilib oldi, “Roma” esa 15-oʻringa tushib ketdi.