Fransiya poytaxtida oʻtkazilayotgan yozgi Olimpiada oʻyinlarida oʻzbek sportchilari oʻz yurishlarini davom ettirmoqda.

Baydarkada eshkak eshish boʻyicha Oʻzbekiston terma jamoasi aʼzosi Yekaterina Shubina “Parij-2024” yozgi Olimpiadasidagi ishtirokini boshladi.

Qayd etish kerakki, yurtdoshlarimiz orasida birinchi boʻlib Yekaterina Shubina 500 metr masofaga kechgan saralash bosqichida startga chiqdi.

5-guruhda harakat qilgan Shubina 1:58.37 daqiqa bilan 6-boʻlib marra chizigʻini kesib oʻtdi. Endi yurtdoshimiz chorak final orqali yarim final yoʻllanmasi uchun kurashni davom ettiradi.

Shubina Yekaterina Vyacheslavovna 1988-yil 2-mayda tugʻilgan. “Pekin-2008”, “London-2012”, “Rio-2016” va “Tokio-2020” yozgi Olimpiya oʻyinlarining kvalifikatsion musobaqalarida oʻta olmagan, biroq “Parij-2024” musobaqasiga yoʻllanma oldi.

Baydarkachi qizimiz faoliyati davomida Osiyo oʻyinlarida 2 ta kumush va 3 ta bronza medallariga sazovor boʻlgan. Shuningdek, qitʼa chempionati va Jahon kubogi bosqchilarida ham bir necha bor shohsupaga koʻtarilgan.

Avvalroq,Asadxoʻja Moʻydinxoʻjayev Parij Olimpiadasi oltini uchun ringga chiqishi haqida xabar berilgandi.