Foto: Prezident matbuot xizmati

Prezident Shavkat Mirziyoyev raisligida oʻtayotgan yigʻilishda Surxondaryoning turizm salohiyatini ishga solib, yiliga 1 milliard dollarlik tushum qilish imkoni borligi qayd etildi.

Viloyatda Al-Hakim at-Termiziy, Sulton Saodat, Kokildor ota, Qirq qiz singari 150 dan ziyod madaniy meros obyekti joylashgan. Hisor, Boysuntogʻ, Koʻhitang, Bobotogʻda alpinizm, trekking, ekoturizm uchun juda katta imkoniyat bor.

Yigirma olti asrlik tarixga ega Eski Termiz yodgorligi toʻliq oʻrganilmagan. Buddizm madaniyatiga oid Fayoztepa, Qoratepa, Dalvarzin, Zurmala kabi yodgorliklarning turizm salohiyatidan foydalanib, Yaponiya, Koreya, Xitoy, Tailanddan yiliga 500 ming sayyoh jalb qilish mumkin.

Mutasaddilarga Yaponiya turagentlari bilan turizm marshruti ishlab chiqib, muzey, oʻzbek-yapon oshxonasi va Yapon bogʻi tashkil qilish boʻyicha loyihalarni boshlash topshirildi.

Polvonlar yurti Surxondaryoda 8 mingdan ortiq yoshlar kurash bilan doimiy ravishda shugʻullanadi. Joriy yilda Denovdagi “Zamondosh” oromgohi negizida kurashchilar uchun zamonaviy oʻquv-mashgʻulot bazasini qurib berish topshirildi.

Boysundagi maktab-internatda kurash bilan shugʻullanayotgan yoshlar uchun shu yerning oʻzida taʼlim olish imkoniyatini yaratish kerakligi qayd etildi. Yangi oʻquv yilidan ushbu maktab-internatda sport bilan birga maktab darslari ham yoʻlga qoʻyiladi.