Kogon tumani “Navroʻz” mahalla fuqarolar yigʻini hududida maishiy chiqindilarni yoqish yoʻli bilan elektr energiyasi ishlab chiqaruvchi korxona qurilishiga kirishildi. Bu loyiha davlatimiz rahbarining tegishli qaroriga koʻra, Chiqindilarni boshqarish va sirkulyar iqtisodiyotni rivojlantirish agentligi hamda Xitoy Xalq Respublikasining “Wangneng Environment” ekologik kompaniyasi oʻrtasidagi tuzilgan bitim asosida amalga oshirilyapti.

Maʼlumotlarga qaraganda, loyihaning umumiy qiymati 165 million AQSH dollari miqdorida boʻlib, korxonada kuniga 1,5 ming tonna maishiy chiqindini qayta ishlash va yil davomida jami 400 million kilovatt soat elektr energiyasi ishlab chiqarish mumkin boʻladi. Ekologik, iqtisodiy jihatdan samarali bu noyob loyiha ikki yil ichida amalga oshiriladi. 120 ta yangi ish oʻrni yaratiladi.Muhimi, u “Yashil iqtisodiyot” tamoyillariga mos keladi. Chiqindi tashlanadigan maxsus joylarga boʻlgan ehtiyojni kamaytiradi. Ekologik barqarorlikka xizmat qiladi.

Korxona qurilishiga tamal toshi qoʻyilishi munosabati bilan oʻtkazilgan tadbirda qatnashgan Buxoro viloyati hokimi B. Zaripov, Chiqindilarni boshqarish va sirkulyar iqtisodiyotni rivojlantirish agentligi hamda “Wangneng Environment” ekologik kompaniyasi masʼullari ana shularni alohida taʼkidlashdi.

Istam IBROHIMOV, “Xalq soʻzi”.