“Navoiy” chegara bojxona postida 15 bosh sharq boʻgʻma ilonlarini noqonuniy olib oʻtmoqchi boʻlgan shaxs qoʻlga olindi. Bu haqda Bojxona qoʻmitasi matbuot xizmati maʼlum qildi.

Unga koʻra, Toshkent viloyati bojxona boshqarmasi hamda Ekologiya, atrof-muhitni muhofaza qilish va iqlim oʻzgarishi vazirligi xodimlari bilan hamkorlikda oʻtkazilgan tezkor tadbirda yurtimizdan chiqib ketayotgan qoʻshni davlat fuqarosi 15 bosh tirik boʻgʻma ilonlarni ruxsatnomalarsiz olib chiqmoqchi boʻlgan vaqtida toʻxtatib qolingan.

Fuqaroga tegishli boʻlgan 10 litr hajmli yelim idishga joylangan mazkur ilonlar sharq boʻgʻma iloni zotiga mansub boʻlgan.

Maʼlumotlarga koʻra, ular Oʻzbekiston Respublikasida Ustyurt platosi, Markaziy Qizilqum, Zarafshon vodiysi, Qarshi choʻli, Zarafshon togʻi, Qashqadaryo, Jizzax viloyati, Sirdaryo viloyati choʻllari, Toshkent viloyatidagi togʻ yonbagʻirlari, Fargʻona vodiysi, Surxondaryo viloyatining togʻoldi qismida uchraydi.

Shuningdek, bu ilonlar Oʻzbekiston Qizil kitobiga kiritilgan boʻlib, hozirda jonivorlar Toshkent hayvonot bogʻiga topshirildi.

Avvalroq ham ushbu chegara bojxona postidan 15 dona noyob “Kolvar” turiga mansub ilonlarni olib oʻtmoqchi boʻlgan shaxs qoʻlga olinganini maʼlum qilgandik.