— Biznesni yuritish va tadbirkorlik faoliyatini amalga oshirishda bir qator hal etilmagan muammolar saqlanib qolmoqda.

Davlat va xoʻjalik boshqaruvi organlari tomonidan tadbirkorlar faoliyatiga noqonuniy aralashuv, turli byurokratik toʻsiqlar yaratish kabi salbiy holatlar toʻliq bartaraf etilmagan.

Mazkur sohada oʻtkazilgan nazorat tadbirlarida 5 833 ta tadbirkorlik subyektining huquqlari buzilgani aniqlangan.

Shulardan 1 281 tasi — bankdagi hisob varaqlari boʻyicha operatsiyalarni asossiz toʻxtatib turish, 347 tasi — ortiqcha mablagʻ undirish, 466 tasi — murojaatlarni koʻrib chiqish talablariga rioya qilmaslik, 465 tasi — davlat xizmati koʻrsatish tartibini buzish, 408 tasi — litsenziyalash va ruxsat berish toʻgʻrisidagi qonun hujjatlarini buzish, 181 tasi — faoliyatni tekshirish va taftish qilish tartibini buzish, 838 tasi — imtiyozlar va preferensiyalarni qoʻllamaslik, 58 tasi — xususiy mulk huquqini buzish, 43 tasi — muhandislik kommunikatsiya tarmoqlariga ulamaslik va ulardan asossiz uzish, 248 tasi — yer ajratish qoidalariga rioya qilmaslik, 64 tasi — bank xizmati koʻrsatilishida qonun talabini buzish kabi harakatlar va 1 434 ta boshqa qonun buzilishi holatlari natijasida tadbirkorlarning huquqlari buzilgan.