15-21-fevral kunlari Oʻzbekiston Respublikasi Turizmni rivojlantirish davlat qoʻmitasi tomonidan Buyuk Britaniyaning oʻnta nufuzli OAV vakillari uchun press-tur oʻtkazildi.

Press-turning maqsadi — Oʻzbekistondagi togʻ-changʻi turizmi imkoniyatlarini va mamlakatda qishki turizm salohiyatini ommalashtirish hamda xalqaro auditoriyaga keng yoritish. Guruh tarkibiga Oʻzbekiston turizm brendining Buyuk Britaniyadagi elchisi Sofi Ibbotson, “Metro” nashrining muxbiri Demian Gabet, “The Telegraph” nashrining muxbiri Feliks Milne, “City A.M” nashrining muxbiri Raynoi Eli, “The Evening Standard” nashrining muxbiri Maykl Makichiran, “The Snow” nashrning muxbiri Styuart Deyli, “The Snow Enthusiast” muxbiri Jastin Gosling, “Culture Trip” muxbiri Tristan Kennedi “The Financial Times” muxbiri Simon Usborn va fotograf Jon Fray kirgan.

Xorijiy delegatsiya ishtirokchilari Toshkent viloyatidagi “Amirsoy”, “Beldersoy” va “Charos” togʻ kurortlarida boʻlishdi. 16-fevral, yakshanba kuni guruhning bir qismi uchun heli-skiing (vertolyot bilan togʻ choʻqqisiga koʻtarilib changʻida tushish) turi hamda jarayonni vertolyotdan suratga olish ishlari uyushtirildi. Sayyohlik sohasiga ixtisoslashgan jurnalistlar safar natijalariga koʻra Britaniya nashrlarida Oʻzbekistondagi qishki turizm imkoniyatlarini yoritishni rejalashtirmoqdalar. Bu kabi tadbirlar respublikada turizmning qishki va ekstremal turlarning rivojlanishiga yordam beradi va mamlakatda ushbu sohani rivojlantirish boʻyicha koʻrilayotgan chora-tadbirlarni keng yoritadi.