Buyuk Britaniyada koronavirus infeksiyasining yana bir mutatsiyasi aniqlangan. Bu haqda Buyuk Britaniyaning sogʻliqni saqlash vaziri Mett Xenkok maʼlum qildi. Ushbu shtamm mamlakat hududiga Janubiy Afrika Respublikasidan kirib kelgan. U yangi shtamm yana-da yuqumli ekanligini aytmoqda.

“Shu munosabat bilan Buyuk Britaniya hukumati Janubiy Afrika Respublikasiga sayohat qilishga cheklov oʻrnatadi, shuningdek, ushbu mamlakatdan kelganlar va ular bilan muloqotda boʻlganlar uchun ikki haftalik majburiy karantin joriy qilinadi”, degan vazir.

14-dekabr kuni Buyuk Britaniya olimlari mamlakatda oldin maʼlum shtammlardan tezroq tarqaladigan virusning yangi mutatsiyasini aniqlashganini maʼlum qilishdi.

Kuchli epidemiologik vaziyat tufayli 20-dekabrdan Buyuk Britaniyaning janubi-sharqida va Londonda maksimal toʻrtinchi darajadagi cheklovlar joriy etildi. Odamlarga uylaridan chiqmaslik tavsiya qilindi.

Qirqqa yaqin mamlakat, shu jumladan, Oʻzbekiston ham Buyuk Britaniya bilan transport aloqalarini toʻxtatganini maʼlum qildi. Keyinchalik ushbu mutatsiya Italiya, Germaniya, Daniya, Avstriya, Avstraliya, Niderlandiya va Janubiy Afrika Respublikasida ham aniqlangani maʼlum qilindi.

Keyinchalik Buyuk Britaniyada aniqlangan koronavirusning yangi shtammi bolalar uchun xavfli ekani maʼlum qilindi.