Buxoro viloyatida tabiiy gazdan noqonuniy foydalanish holatlari aniqlandi. Bu haqida “Hududgaztaʼminot” AJ xabar berdi.

Unda aytilishicha, “Hududgaz Buxoro” gaz taʼminoti filiali komplayens nazorat tuzilmalari hamda filialning tegishli boʻlim masʼullari bilan joylarda reyd tadbirlari tashkil etilgan.

Tadbir doirasida Buxoro shahar A. Borband koʻchasida yashovchi fuqaro E. X. xonadoni koʻzdan kechirilgan. Aniqlanishicha, isteʼmolchi hisoblagichni chetlab oʻtib, tabiiy gaz tarmogʻiga noqonuniy ulanib olgani maʼlum boʻlgan.

Dastlabki hisob-kitoblarga koʻra, isteʼmolchi tomonidan gaz taʼminoti korxonasiga 121 million 206 ming soʻm zarar yetkazilgani aniqlangan.

Shu kabi yana bir holat, Gʻijduvon tumanining “Xaticha” MFYda ham aniqlanib, unda mahallada istiqomat qiluvchi fuqaro R. I. loyiha-texnik hujjatlarisiz “zangori yoqilgʻi”dan foydalanib kelayotgani fosh qilingan. Holat boʻyicha 74 mln 966 ming soʻmlik zarar qayta hisob-kitob qilingan.

Hozirda barcha holatlar boʻyicha dalolatnomalar tuzilib, tegishli tartibda huquqni muhofaza qiluvchi organlarga topshirilgan.