Buxoro viloyatida 1,4 mlrd soʻmlik tabiiy gazdan noqonuniy foydalanish holatlari fosh etildi. Bu haqida “Hududgaztaʼminot” AJ xabar berdi.

Maʼlum qilinishicha, Buxoro tumani “Gulshanobod” MFYda joylashgan “D. J. 2.” oilaviy korxonasiga qarashli umumiy ovqatlanish maskanida tezkor tadbir oʻtkazilgan.

Aniqlanishicha, isteʼmolchi taʼminot tashkiloti bilan shartnoma rasmiylashtirmasdan oʻzboshimchalik bilan tarmoqqa ulanib olgan holda tabiiy gazdan noqonuniy foydalanib kelayotgani fosh qilingan. Dastlabki hisob-kitoblarga koʻra keltirilgan zarar 1 milliard 160 million soʻmni tashkil qilgan.

Shu kabi yana bir holat viloyatning Shofirkon tumanida ham qayd etilgan. “Mingchinor” MFYda istiqomat qiluvchi fuqaro X. B. oʻz xonadonidagi issiqxonani qizdirish maqsadida hisoblagichdan tashqari tarmoq tortib, “zangori yoqilgʻi”dan oʻgʻrincha foydalanib kelayotgani aniqlangan. Holat boʻyicha 135 million 360 ming soʻm zarar qayta hisob-kitob qilingan.

Mazkur holatlar boʻyicha tegishli hujjatlar huquqni muhofaza qiluvchi organlarda yuborilib, nazorat tadbirlari davom ettirilmoqda.