Qarshi muhandislik-iqtisodiyot instituti Iqtisodiyot fakultetida “Iqtisodiyotni raqamlashtirish sharoitida buxgalteriya hisobi, iqtisodiy tahlil va auditni xalqaro standartlar asosida rivojlantirish muammolari va istiqbollari” mavzusida respublika ilmiy-amaliy anjumani oʻtkazildi.
Mazkur anjumanda dastlab bugungi kunda iqtisodiyot sohasidagi yangilanishlar, xalqaro tajribalar, taʼlimdagi oʻzgarishlar mohiyati haqida soʻz bordi.
Toshkent davlat iqtisodiyot universiteti “Moliyaviy tahlil va audit” kafedrasi professori Bahodir Hasanov “Moliyaviy hisobotning xalqaro standartlari asosida hisob va tahlil tizimini takomillashtirish” mavzusida maʼruza qildi. Bu borada erishilgan yutuqlar bilan birga, amalga oshirilishi lozim boʻlgan ishlar haqida ham gapirib oʻtdi.

Shundan soʻng, oʻzining muallifligidagi kitoblarni hamda eng sara badiiy asarlarni institut va fakultet rahbariyatiga, kafedralarga tuhfa qildi.

Iqtisodiyotni raqamlashtirish sharoitida buxgalteriya hisobi, iqtisodiy tahlil va auditni xalqaro standartlar asosida rivojlantirish muammolari va istiqbollari muhokamasiga bagʻishlangan ushbu anjumanda maʼruzalar va ularning muhokamalari shuʼbalarda ham davom ettirildi.

Shohsanam YOʻLDOSHEVA,

OʻzDJTU talabasi.